Ang Engols at si Juan (The Filipino and the Problem with English)

Nanuod ako kanina ng I-Witness at pinag-usapan dito ang problema nating mga Filipino sa tamang paggamit ng wikang Ingles. Nakakatawang makita ang mga maling paggamit ng Ingles pero sa isang kabila nakakahiya rin. Isipin mo pati ba naman yung marker sa rebulto ni Max Soliven ay may dalawang mali. Grabe ha. Anung problema? Simple lang naman eh pinipilit nating maging magaling sa wikang banyaga pero mali ang ating pamamaraan at habang ginagawa natin ito ay ating napabayaan ang ating sariling pambansang wika. Ano ang ating pambansang wika? Kung ang sagot mo ay Tagalog ay nagkakamali ka.

Ang atin pong pambansang wika ay Filipino. Ang Filipino ay isang wika na kung saan pinagsama-sama ang wika ng iba pang mga diyalekto sa ating bansa. Ito ay pinapaunlad dapat ng Surian ng Wikang Pambansa. Asan na nga ba ang Surian ng Wikang Pambansa? Tila yata wala na akong balita sa kanila.

Noong pagkatapos ko ng kolehiyo ay alam pa namin na ito ang ating wika pero ngayon palaging nalalagay sa resume kapag tinanong na ang, "Languages Spoken" nakalagay lagi ay Tagalog at ang nationality na lang ang nilalagay na Filipino. Ang alam ko nga dapat ay Pilipino ito at hindi Filipino.

Isa pa siguro sa dahilan kung bakit nahihirapan tayong matuto ng Ingles na dati ay hindi naman ganun kabigat ay sa dahilang halos lahat ng palabas sa telebisyon ngayon ay Tagalized na. Dati noon talagang matututo ka dahil pag anime o cartoon e English ang sinasalita. Saka di pa noon puro teleserye na todo-todo ang drama kasi may mga galo pang U.S. series tulad ng Beverly Hills 90210, Doogie Howser M.D., McGyver at iba pa.

Sang ayon naman ako sa tinuran ng I-Witnes na dapat multi-lingual ang medium of instruction. Ating gamitin ang ating sariling wika sa pagtuturo. Diyan tiyak ako na maraming matututo. Dapat nga maging sa pamahalaan at mga batas ay ito ang ating ginagamit. Aba ay para kanino ba ang batas hindi ba para sa mga Pilipino? Eh bakit nakasulat sa wikang banyaga. Pag nagdedebate nga at nagsesesyon ay Ingles pa rin... aba ay nasa Amerika ba tayo? Dapat mahalin natin ang ating sariling wika.

Kaya nga lubos ako na humanga kay Erap noon sapagkat siya lamang ang nagpauso ng pagsasalita sa wikang Filipino at ito rin ang kanyang ginamit sa kanyang talumpati ng maupo bilang Pangulo. Yun nga lang natanggal sya sa pwesto dahil na rin sa pinagkaisahan siya ng kanyang mga dating kasamahan.

Ang pagmamahal din sa ating bansa at sa wika ang dahilan kung bakit naniniwala ako kay Nick Perlas. Si Nick Perlas lang sa mga kumakandidato ang nagbabalak pagandahin ang ating Edukasyon sa isang paraan na hindi gaya ng karaniwan. Pagbabago na gagamit ng multi-lingual na paraan at magpapalabas ng iba't-ibang kagalingan ng mamamayan (multiple intelligence approach in education).

Narito po ang ilang mga karatula na talaga namang salang-sala ang grammar at spelling.

Kayo na po ang bahalang humusga. Nakakatawa pero nakakatakot din.